Առկա անվտանգային մարտահրավերներին համապատասխանող, օպերատիվ վերակազմավորվող և արագ համալրվող ԶՈՒ։
Պաշտպանված Հայաստան
Մարտունակ բանակը մեր անվտանգության թիվ մեկ երաշխավորն է։ Մեր նպատակն է արդիականացնել երկրի պաշտպանական համակարգը՝ զարգացնելով ռազմավարական զսպման նոր կարողություններ։ Մենք կմշակենք նոր Ազգային անվտանգության ռազմավարություն և Զինված ուժերի զարգացման հայեցակարգ՝ կառուցելով ժամանակակից սպառնալիքներին դիմակայող ուժեղ պետություն։
«Խելացի սահման» մոդել՝ ապահովված սահմանագծի ամբողջական ինժեներական կահավորմամբ և տեխնոլոգիական վերահսկողության համակարգերով, որը կերաշխավորի սահմանների պաշտպանության բարձր հուսալիություն։
Պետական լայնածավալ աջակցությամբ կստեղծվի ժամանակակից ռազմարդյունաբերություն, որը կապահովի մարտավարական ԱԹՍ-ների ամբողջական տեղական արտադրություն և համատեղ ձեռնարկությունների հիմնում միջազգային գործընկերների հետ:
Ծառայության գրավչության ապահովում՝ բարձր աշխատավարձերով, արդար ատեստացիոն համակարգով և կրթական արտոնություններով: Որպես հավելյալ աջակցություն՝ զինծառայողների ծնողների եկամտահարկը կնվազեցվի 10 տոկոսով:
Վարժական հավաքների պարտադիր ռոտացիոն համակարգի ներդրում, որը կերաշխավորի պահեստազորի շարունակական վերապատրաստումը և տարածքային պաշտպանության ուժերի արդյունավետ գործակցությունը:
Բանակից անօրինական խուսափած անձանց կարգելվի զբաղեցնել բարձր պետական պաշտոններ: Կիրականացվի հայրենիքի պաշտպաններին և նահատակներին արժևորող պետական քաղաքականություն՝ բանակը դարձնելով պետության նոր, վստահելի դեմքը:
Արժանապատիվ Հայաստան
Դիվանագիտությունը պետք է սպասարկի բացառապես պետության ռազմավարական նպատակներն ու հայկական շահը։ Մենք վարելու ենք արժանապատիվ և փոխլրացնող արտաքին քաղաքականություն՝ խորացնելով դաշնակցային կապերն ու ձևավորելով կանխատեսելի, վստահելի գործընկերություն բոլոր ուժային կենտրոնների հետ։
Նոր որակի դաշնակցային հարաբերությունների ձևավորում Ռուսաստանի հետ՝ ներառյալ ԵԱՏՄ և ՀԱՊԿ շրջանակներում: Ռազմավարական գործակցության խորացում Իրանի և Չինաստանի հետ, ինչպես նաև փոխշահավետ հարաբերությունների զարգացում ԱՄՆ-ի, ԵՄ-ի (վիզաների ազատականացմամբ) և ինտեգրում BRICS-ի տնտեսական շուկաներին:
Թուրքիայի հետ հարաբերությունների կարգավորում առանց նախապայմանների: Ադրբեջանի հետ խաղաղության հաստատում՝ հիմնված միջազգային գործուն երաշխիքների և ՀՀ ինքնիշխան տարածքից ադրբեջանական զորքերի պարտադիր դուրսբերման վրա:
Սահմանագծումն ու սահմանազատումը կիրականացվեն բացառապես միջազգային անխոցելի իրավական հիմքերով: Տարածաշրջանային ճանապարհների ապաշրջափակում՝ որպես գլխավոր առաջնահերթություն դիտարկելով Աբխազիայով անցնող երկաթուղային կապի վերականգնումը:
Արցախի ժողովրդի հավաքական հայրենադարձության իրավունքի միջազգայնացում և անվտանգության երաշխավորում: Գործուն քայլեր՝ Ադրբեջանում պահվող բոլոր հայ գերիների վերադարձի և վտանգված հոգևոր-մշակութային ժառանգության պաշտպանության ուղղությամբ:
Բռնի տեղահանված մեր հայրենակիցների քաղաքացիության հարցերի օպերատիվ լուծում, ինչպես նաև բնակարանային, զբաղվածության և սոցիալական ապահովման կայուն ծրագրերի իրագործում:
Մրցունակ Հայաստան
Ուժեղ պետության հիմքը մրցունակ և արտահանմանը միտված տնտեսությունն է։ Մեր թիրախն արդյունաբերական վերածնունդն է և տեխնոլոգիական թռիչքը։ Մենք կստեղծենք բարենպաստ հարկային ու ներդրումային միջավայր, որտեղ բիզնեսը կզարգանա, իսկ «Արտադրված է Հայաստանում» պիտակը կդառնա բարձր որակի համաշխարհային երաշխիք։
Ավտոմատացված հաշվետվությունների ներդրում, ՓՄՁ հարկային բեռի թեթևացում և ռազմավարական արտադրողների համար 0% շահութահարկ ու ԱԱՀ-ից ազատում: «Արտադրված է Հայաստանում» բրենդը կդառնա որակի հոմանիշ՝ արդյունաբերությունը հասցնելով ՀՆԱ 25%-ի:
Թիրախային պետական աջակցություն բարձր տեխնոլոգիական ստարտափներին և գիտահետազոտական նախագծերին՝ շեշտը դնելով ռազմարդյունաբերության և արհեստական բանականության վրա:
Արդար տոկոսադրույքների սահմանում, «սև ցուցակների» վերանայում և պայմանների ստեղծում, որպեսզի վարկավորվի իրական տնտեսությունը (և ոչ միայն սպառումը): Ներդրումային նոր հիմնադրամի գործարկում՝ խոշոր ծրագրերի համար:
Տարեկան 35,000-45,000 նոր աշխատատեղերի ստեղծում՝ գործազրկության կրկնակի կրճատմամբ: 2026թ. նախատեսված գույքահարկի բարձրացման չեղարկում և հետագա 50% նվազեցում (բացի շքեղ գույքից):
Պարտքի արդյունավետության խիստ աուդիտ, զբոսաշրջիկների թվի հասցնում տարեկան 5 միլիոնի և «Բնապահպանական ներդրումներ՝ պետական պարտքի դիմաց» ծրագրի իրագործում:
Արարող Հայաստան
Պետությունը պետք է դառնա գյուղացու կայուն եկամուտն ապահովող և ռիսկերը նվազեցնող գլխավոր գործընկերը։ Մեր նպատակն է ստեղծել ժամանակակից, բարձրարժեք գյուղատնտեսություն՝ հողի աշխատավորին տրամադրելով մատչելի վարկեր, երաշխավորված մթերում և գործուն ապահովագրական պաշտպանություն։
Մինչև 15 մլն դրամի նպատակային վարկերի ամբողջական սուբսիդավորում: Պարարտանյութի, բուժանյութի, սերմացուի և վառելիքի տրամադրում՝ շուկայականից զգալիորեն էժան գներով:
Ճկուն և կանխատեսելի մթերման համակարգի ներդրում՝ մթերող ընկերություններին տրամադրվող վարկերի նպատակային սուբսիդավորմամբ և վերամշակող արդյունաբերության խթանմամբ:
Ագրոապահովագրության համակարգի լայնածավալ ընդլայնում և կարկտապաշտպան կայանների ցանցի կրկնակի խտացում ռիսկային գոտիներում՝ բնական աղետներից պաշտպանելու համար:
Անմշակ հողերի տարեկան առնվազն 10% կրճատում՝ չմշակվող հողերի մշակման դեպքում առաջին տարում յուրաքանչյուր հեկտարին 60,000 դրամ պետական աջակցության տրամադրմամբ:
Օրենսդրական փոփոխություններով հողագործությունը կհամարվի որպես պաշտոնական աշխատանքային ստաժ:
Արդար Հայաստան
Մենք մերժում ենք ուժի իրավունքը և երկրում վերականգնելու ենք իրավունքի գերակայությունն ու սահմանադրական կարգը։ Կառուցելու ենք արդար և թափանցիկ պետություն, որտեղ դատական համակարգն իսկապես անկախ է, իսկ պետական կառավարումը հիմնված է բացառապես պրոֆեսիոնալիզմի վրա։
Գլխավոր դատախազի, ԲԴԽ, ՍԴ անդամների և ՄԻՊ ընտրություն՝ ընդդիմադիր ձայների պարտադիր մասնակցությամբ: Քաղաքական դրդապատճառներով հետապնդվածների իրավունքների վերականգնում և համաներման իրականացում:
Քաղաքական հավատարմության փոխարինում պրոֆեսիոնալիզմով և պարգևավճարների համակարգի վերանայում: Անհիմն ազատումներից պաշտպանված քաղաքացիական ծառայության վերականգնում և բազային աշխատավարձի բարձրացում:
Մեկ միասնական պատուհանի ստեղծում յուրաքանչյուր քաղաքացու համար, որով մեկ հպումով հասանելի կդառնան բոլոր պետական և հանրային ծառայությունները:
«Պադավատապետության» վերացում և կառավարական ամառանոցների (Կոնդ, Սևան) վերածում վերականգնողական կենտրոնների: Պաշտոնյաների կողմից սուտ տեղեկատվության տարածման քրեականացում:
Հայ Առաքելական Եկեղեցու դեմ ապօրինի արշավների կասեցում, ինչպես նաև ազգային փոքրամասնությունների իրավունքների ու ինքնության լիարժեք պաշտպանություն:
Հոգատար Հայաստան
Իրական սոցիալական պետության կենտրոնում մարդն է։ Մենք երաշխավորելու ենք արժանապատիվ կենսամակարդակ, բարձր թոշակներ ու աշխատավարձեր և որակյալ առողջապահություն՝ բոլորի համար։ Պետությունն իր առանձնահատուկ հոգածության ներքո է առնելու նորաստեղծ և բազմազավակ ընտանիքներին՝ խթանելով ժողովրդագրական աճը։
Նվազագույն աշխատավարձը կհավասարեցվի կենսապահովման զամբյուղին: Կիրականացվի կենսաթոշակների 50% շեշտակի բարձրացում և պարտադիր տարեկան ինդեքսավորում: Ձմռանը միայնակ թոշակառուների գազի և հոսանքի ծախսերը 100%-ով կփոխհատուցվեն պետության կողմից:
Երիտասարդ ընտանիքների համար անշարժ գույք ձեռք բերելու նպատակով եկամտահարկի վերադարձի վերականգնում և «Աճող ընտանիքի» մոդելի ներդրում (երկրորդ երեխայից սկսած եկամտահարկի 3-ական տոկոսային կետով նվազեցում):
Համընդհանուր ապահովագրության ներդրում, դեղերի գների անհիմն բարձրացման բացառում և բուժաշխատողների բազային աշխատավարձերի կտրուկ ավելացում:
Միայնակ մայրերին և բազմազավակ ընտանիքներին սոցիալական աջակցության լայն փաթեթներ: Տաքսու վարորդների գործունեության իրավական ամրագրում որպես աշխատանքային ստաժ:
Էլեկտրաէներգիայի սակագնի նվազեցում, պաշտոնյաների շահերի բախման բացառում (հիմնադրամների արգելքով) և հաշմանդամություն ունեցող անձանց զբաղվածության ապահովման քվոտային համակարգ:
Կենսունակ Հայաստան
Հայաստանը պետք է դառնա տարածաշրջանային անվտանգ և ինքնիշխան տարանցիկ հանգույց։ Մեր ռազմավարությունն է՝ կառուցել նոր ատոմակայան, արդիականացնել ճանապարհային ու ջրային ցանցերը և ապաշրջափակել կապուղիները՝ մեր պետության ինքնիշխանության և փոխադարձության սկզբունքների անշեղ պահպանմամբ։
ՀՀ տարածքով անցնող բոլոր ենթակառուցվածքները մնալու են մեր ինքնիշխանության ներքո: Կապուղիների ապաշրջափակումը հնարավոր է միայն նույնական ռեժիմի և փոխադարձության պահպանմամբ:
Դիլիջան-Վանաձոր երկաթուղու կառուցում և ճանապարհային նոր, երկարակյաց հանգույցների ձևավորում:
Նոր, ժամանակակից ատոմային էլեկտրակայանի կառուցման ծրագրի մեկնարկ՝ անվտանգության ամենաբարձր չափանիշներով:
Լայնածավալ ջրամբարաշինություն, ոռոգման ցանցերի վերականգնում (մատչելի սակագնով), ինչպես նաև Սևանի էկոհամակարգի պաշտպանություն՝ որպես կենսոլորտային և տնտեսական կլաստեր:
Առաջադեմ, կրթված ու մշակութային Հայաստան
Ազգային առաջընթացի հիմքը գիտելիքահենք հասարակությունն է։ Մենք ապահովելու ենք ազգային արժեքների վրա խարսխված մատչելի կրթություն, առաջանցիկ գիտություն և մշակութային վերածնունդ՝ պետության գործուն հոգածությամբ արժևորելով ուսուցչի, գիտնականի և ստեղծագործողի աշխատանքը։
«Հայոց լեզու», «Գրականություն» և «Հայոց պատմություն» առարկաների նոր չափորոշիչների ու դասագրքերի ներդրում: Նախադպրոցական կրթության անվճար համակարգի (առնվազն 90% հասանելիությամբ) և պետական բուհերում 100% անվճար ուսուցման ապահովում:
Աշխատավարձերի կտրուկ բարձրացում: 15 տարվա ստաժ ունեցող մանկավարժների համար «վստահության քվեի» (ավտոմատ ատեստավորման) ներդրում:
Բուհերի ու դպրոցների ղեկավարների կուսակցականացման արգելք: Բուհերի խոշորացման կասեցում և սահմանամերձ դպրոցների փակման բացառում:
Գիտության բյուջեի հասցնում ՀՆԱ 1.5%-ի: Հայագիտության ճանաչում՝ որպես պետական առաջնահերթություն և տեխնոլոգիական հաբերի ստեղծում՝ ռազմարդյունաբերության համար:
«Թատրոնի մասին» օրենքի ընդունում, մշակույթի մշակների աշխատավարձերի շեշտակի բարձրացում և գրահրատարակչության (մանկական, գիտական) ազատում ԱԱՀ-ից:
Միասնական Հայկական Աշխարհ
Հայաստանը աշխարհասփյուռ հայության անվտանգ և հարազատ տունն է։ Առաջնորդվելով «Մեկ ազգ, մեկ ճակատագիր» սկզբունքով՝ մենք ինստիտուցիոնալ նոր մակարդակի կբարձրացնենք Հայաստան-Սփյուռք կապը՝ խթանելով հայրենադարձությունն ու համահայկական ներուժի լիարժեք ներգրավումը մեր երկրի զարգացման գործում։
Սփյուռքի հետ ինստիտուցիոնալ կապերի որակական նոր մակարդակ և համահայկական ցանցային հնարավորությունների ակտիվ ներգրավում պետական նախագծերում:
«Հայրենադարձության մասին» օրենքի ընդունում և «Մեկ պատուհան» կենտրոնի ստեղծում՝ գործընթացը դյուրացնելու և իրավական աջակցություն տրամադրելու համար:
Վստահության վերականգնում՝ թափանցիկության միջազգային խիստ ստանդարտների կիրառմամբ և միջոցների նպատակային ուղղմամբ դեպի սահմանամերձ բնակավայրեր:
Աշխարհասփյուռ ներուժով սնվող սոցիալական աջակցության համակարգի ստեղծում՝ խթանելու ծնելիությունը և զարգացնելու սակավաբնակ բնակավայրերը:
Մարդակենտրոն Երեվան
Երևանը պետք է լինի հարմարավետ, կանաչ և մարդակենտրոն քաղաք։ Մենք նախաձեռնելու ենք տրանսպորտային ու ճանապարհաշինական հեղափոխություն՝ վերջ դնելով խցանումներին, ապահովելով արժանապատիվ հանրային տրանսպորտ և շնչող միջավայր յուրաքանչյուր երևանցու համար։
8 նոր խոշոր հանգույցների կառուցում (խցանումները 30%-ով կրճատելու համար) և բազմամակարդակ (վերգետնյա/ստորգետնյա) ավտոկայանատեղիների հիմնում: «Կարմիր գծերի» ապօրինի թանկացման չեղարկում և գումարի վերադարձ:
Ժամանակակից էլեկտրական 500 ավտոբուսների ներդրում, մետրոյի նոր կայարանների կառուցում դեպի Աջափնյակ ու Դավթաշեն և տրանսպորտի սակագնի վերադարձ՝ 100 դրամի: Լուսացույցների «խելացի» կառավարման ցանցի գործարկում:
Օդի որակի մոնիթորինգ, շինհրապարակների համար «զրոյական փոշի» ստանդարտի սահմանում և Նուբարաշենի աղբավայրի կոնսերվացում՝ նոր վերամշակման գործարանի կառուցմամբ:
Կոյուղատարների լայնածավալ նորոգում՝ հեղեղումների խնդիրը լուծելու համար, և աղբահանության վճարի արդար հաշվարկում ըստ ընտանիքի անդամների թվի (ոչ թե քառակուսի մետրի):
Առողջ ևվ Սթափ Հասարակություն
Մենք հայտարարում ենք զրո հանդուրժողականություն՝ ազգային անվտանգությանն ու հանրային առողջությանը սպառնացող այս չարիքների դեմ։ Քրեական խիստ պատիժներով, թվային կոշտ վերահսկողությամբ և գովազդի տոտալ արգելքով՝ մենք մեր հասարակությունից արմատախիլ ենք անելու թմրամոլությունն ու խաղամոլությունը։
Թմրամիջոցների վաճառքի համար քրեական առավելագույն պատժաչափերի սահմանում՝ առանց վաղաժամկետ ազատման իրավունքի:
Հատուկ կիբերստորաբաժանումների ստեղծում՝ առցանց թմրավաճառներին վնասազերծելու համար, և դպրոցներում «Առողջ ապրելակերպ» պարտադիր ծրագրի ներդրում:
Բուքմեյքերական ընկերությունների գովազդի լիակատար արգելք հեռուստատեսությամբ, ռադիոյով, փողոցներում և առցանց տիրույթում:
Վարկային միջոցներով և կրեդիտային քարտերով խաղադրույքների կատարման արգելք: Ոլորտի հարկերի բարձրացում՝ ուղղելով դրանք սպորտին ու վերականգնողական ծրագրերին:
Անվճար պետական կենտրոնների ստեղծում՝ կախվածություն ունեցող անձանց բժշկական և հոգեբանական օգնություն ցուցաբերելու համար:
