365 ՕՐ.
ԱՊԱԳԱՆ ՍԿՍՎՈՒՄ Է ՀԻՄԱ

21-րդ դարում գլխավոր և ամենակարող ուժը գիտելիքն է դարձել, և հենց գիտելիքն է ծնում իրավունքը այսօրվա աշխարհում։

Առաջադեմ կրթությունը ուժեղ Հայաստան կառուցող ազգի լավագույն ավանդն է, նրա ապագայի գրավականը։

Ուժեղ Հայաստանում ուսուցիչն ամենահարգված և ամենագնահատված մասնագիտությունն է, ամենի սկիզբը։ 

Ուժեղ Հայաստանում կրթությունը պետք է դառնա որակյալ, արդիական և հասանելի բոլորի համար։

Ազգի առողջությունը պետության առաջնահերթությունն է և զարգացման անհրաժեշտ պայմանը։

Սոցիալապես անապահով խավը, մեծահասակներն ու զոհված զինծառայողների ընտանիքները պետք է ստանան անվճար և բարձրորակ բուժօգնություն։

Առցանց բժշկության ներդրումը հնարավորություն կտա խնայելու քաղաքացիների ժամանակն ու ֆինանսական միջոցները։

Յուրաքանչյուր մարզում կստեղծվի բարձրակարգ կադրերով և ժամանակակից տեխնիկայով հագեցած բուժկենտրոն։ 

Ուժեղ երկրում մշակույթը առանձնահատուկ կարևորություն ունի, Հայաստանը պարտավոր է ունենալ մշակույթի նախարարություն։

Մշակույթն այն կենսարար արմատն է, որը սնում է ազգային պետությանը և ուժ տալիս նրան։

Ուժեղ Հայաստանն այն պետությունն է, որը միշտ կանգնած է լինելու ստեղծագործ մարդու կողքին։

Մշակույթը ազգային արժեհամակարգի անվտանգության, նրա պահպանման գլխավոր երաշխիքն է։

Նոր աշխատատեղերի ստեղծումը նույնքան կարևոր է, որքան աշխատողների արժանապատիվ վարձատրությունը։

Իրական ներդրումները կապահովեն իրական և շոշափելի արդյունքներ Հայաստանի տնտեսության համար։

Պետությունը ակտիվ աջակցելու է գործարարին, իրականացնելով մասնավորի հետ համագործակցության հատուկ ծրագրեր։ 

Թվային կառավարումը, գործառույթների լայն թվայնացումն ու էլեկտրոնային ձեռներեցությունը դառնալու են Հայստանի զարգացման շարժիչը։

Հայաստանի բոլոր համայնքները հավասարապես կարևոր են, անկախ աշխարհագրական դիրքից և բնակչության քանակից։

Բարձրակարգ ճանապարհները և հուսալի տրանսպորտը համայնքների զարգացման կարևորագույն գործոններն են։

Հայաստանում զբոսաշրջության ակտիվ զարգացումը շենացնելու և հարստացնելու է երկրի համայնքները։

Ուժեղ Հայաստանը հողի վրա աշխատող մարդու երկիր է և պետք է ունենա գյուղատնտեսության նախարարություն։

Ազգային միասնականությունը օրվա հրամայականն է, կենսական նշանակություն ունեցող խնդիր։

Ուժեղ Հայաստանում կանխվելու է արտագաղթը և կստեղծվեն ակտիվ ներգաղթի և հայրենադարձության բարենպաստ պայմաններ։

Ուժեղ Հայաստանը վերականգնելու է Սփյուռքի վստահությունը պետության նկատմամբ։

Հայկական պետությունը ազգի պահպանման և բնականոն զարգացման գլխավոր երաշխիքն է, չկա հայություն առանց Հայաստան։

Երկրի անվտանգությունը առաջնահերթություն է, պետության առջև կանգնած կարևորագույն խնդիրն է։ 

Ուժեղ Հայաստանը մերժելու է պարտվածի հոգեբանությունը և կերտելու է արժանապատիվ խաղաղություն։

Ժամանակակից զինատեսակներով զինված, մարտունակ, ուժեղ ազգային բանակն է Հայաստանի և Արցախի խաղաղ սահմանների երաշխիքը։

Հայաստանը կրկին դառնալու է տարածաշրջանային լուրջ գործոն, հուսալի և կանխատեսելի գործընկեր միջազգային ասպարեզում։ 

Սիրելի՛ հայրենակիցներ,

Ինչպես տեղյակ եք, մենք ներկայացրել ենք մեր նախընտրական ծրագիրը, որը հարստացվել և լրամշակվել է նաև ձեր առաջարկությունների ներառմամբ։ Վերջին օրերի քննարկումների արդյունքում ծնվել է 4 առանցքային փաստաթուղթ, որ ներկայացնում ենք ձեր ուշադրությանը.

1. Իրավական և հակակոռուպցիոն քաղաքականության վերաբերյալ ռազմավարական մոտեցումները

2. ՓՄՁ զարգացման ռազմավարական մոտեցումները

3. Վետերանների հարցով պետական գերատեսչության վերաբերյալ նախագիծ

4. Հայաստանում ռազմարդյունաբերության զարգացման ռազմավարական մոտեցումները

ենք ակնկալում ենք մասնագիտական կարծիքներ և առաջարկություններ, որոնք հաշվի են առնվելու մեր աշխատանքում։

Պետք է պատասխանատվության կանչվեն այն մարմինները, որոնք քաղաքացուն տուգանում են կարմիր գծերի համար` նախապես իմանալով, որ դա ապօրինի է:

Քաղաքացին պետք է 4000 դրամ վճարի`նույն արժողությամբ ապօրինի ակտը վիճարկելու համար:

Կոռուպցիայի կանխարգելման հանձնաժողովը քաղաքականացված է:

Կոռուպցիայի կանխարգելման մարմինը անտեսում է իշխանության ներկայացուցիչների կողմից ակնհայտ կոռուպցիոն գործերը:

Ծրագրի շնորհանդեսը

«Հայաստան» Դաշինքն իր ծրագրային մոտեցումներում Հայաստանում ձեռներեցության խթանումը և կայուն աշխատատեղերի ստեղծումը և համաչափ զարգացումը սահմանել է որպես գերակայություն։ Այս արդյունքին հասնելու համատեքստում անկյունաքարային դեր է կատարելու փոքր և միջին ձեռնարկատիրությունը։ Զարգացող տնտեսություններում հնարավոր 10 աշխատատեղից 7-ը ստեղծվում են փոքր և միջին ձեռնարկությունների կողմից և այդ աշխատատեղերը զբաղեցնողները, ինչպես նաև նախաձեռնող ձեռներեցները կազմում եմ միջին խավի էական մասը։

Փոքր և միջին ձեռնարկատիրության զարգացած միջավայրը նաև նորարարության խթանման համար կարևոր նախադրյալ է։   

ՀՀ փոքր և միջին ձեռնարկությունների մեկ աշխատողի ստեղծած ավելացված արժեքը տարեկան կտրվածքով կազմում է 6.89 մլն ՀՀ դրամ (մոտ 13,200 ԱՄՆ դոլար)։ Նշված ցուցանիշը գրեթե 2.5 անգամ զիջում է ՏՀԶԿ երկրների միջիններին։ Հայաստանն ունի ցածր դիրք նաև Գլոբալ Ձեռնարկատիրության ցուցիչում (Global Entrepreneurship Index) (88-րդ տեղ)։

Այժմ Հայաստանում 1,000 բնակչին բաժին ընկնող ստեղծվող ընկերությունների թիվը երկու անգամ ավելի փոքր է, քան նույն ցուցանիշը բարձր-միջին եկամուտ ունեցող երկրներում։[1]

Ի լրումն Դաշինքի ծրագրում նախատեսված գործարար միջավայրի, հարկային քաղաքականության և վարչարարության վերաբերյալ ընդհանուր միջոցառումների, ՓՄՁ-րի զարգացման հետ կապված Դաշինքի ռազմավարական ուղղությունները և մոտեցումներն են.

[1] Վիճակագրությունը Փոքր և միջին ձեռնարկությունների զարգացման 2020-2024 թվականների ռազմավարությունից։

1. ՓՄՁ ոլորտի զարգացման ինստիտուցիոնալ համակարգի բարելավում և առկա ռեսուրսների և աջակցության մեխանիզմների կոնսոլիդացում և համակարգում,
    
2. Կայուն օրենսդրական, այդ թվում՝ հարկային դաշտի ապահովում, շրջանառության հարկի շեմի բարձրացման դիտարկում կամ առնվազն եղած շեմի պահպանում,
    
3. ՓՄՁ աջակցող կառույցների ուժեղացում,

      4. ՓՄՁ վիճակագրության և վերլուծական արդյունքի բարելավում,

5. ՓՄՁ-ների համար ֆինանսական ռեսուրսների հասանելիության ավելացում. օրինակ՝ պետական երաշխավորության մեխանիզմների կիրառության ընդլայնում, արտահանման ապահովագրության հատուկ գործիքների ներդրում, ուղղակի ֆինանսավորման թիրախային գործիքների կիրառում,

6. ՓՄՁ-ների կողմից ֆինանսական ռեսուրսների ներգրավման այլընտրանքային մեխանիզմների և հարթակների ընդլայնում և այդպիսի հարթակներին պետական աջակցություն, օրինակ՝ քրաուդֆանդինգային, ակսելերացիոն հարթակներ, բիզնես-հրեշտակներ և այլն,

7. սկսնակ գործարարների ձեռներեցության աջակցության ծրագրերի իրականացում, ինչպես նաև սոցիալական ձեռներեցությունը խրախուսելու համար պետական աջակցության գործիքակազմի ներդրում,

8. կանանց ձեռներեցության խթանում,

9. ՓՄՁ-ների ֆինանսական և գործարար գրագիտության և կարողությունների ընդլայնմանն ուղղված միջոցառումներ (այդ թվում ինտերակտիվ լուծումների օգտագործմամբ)՝ դրանք հնարավորինս ինտեգրելով նախնական (արհեստագործական), միջին մասնագիտական և բուհական կրթական համակարգերի մեջ,

10. ՓՄՁ-ների կողմից տեխնոլոգիական վերազինման և նորարարության ներդրման աջակցության մեխանիզմների գործարկում,

11. տարաբնույթ հարթակներում  (այդ թվում նաև էլեկտրոնային) ՓՄՁ արտադրանքի հասանելությունը խրախուսելու, տեղական և արտասահմանյան թիրախային շուկաների վերաբերյալ հետազոտությունները հասանելի դարձնելու, տնտեսական դիվանագիտության գործիքակազմի գործադրմամբ դրանց ճանաչելիությունը և մուտքը դեպի նոր շուկաներ ապահովելու, արտահանմանը նպաստող ենթակառուցվածքներ (օրինակ՝ լոգիստիկ/պահեստային տնտեսություներ) զարգացնելու միջոցով ՓՄՁ-ների արտահանման կարողությունների ընդլայնում,

12. ԵՄ և ԵԱՏՄ միասնական շուկաների հնարավորություններից արդյունավետ օգտվելու աջակցություն և խրախուսում,

13. ՓՄՁ-ների և պետական մարմինների միջև փոխգործակցության գործընթացների (այդ թվում՝ նաև հաշվետվությունների ներկայացման, ստուգումների, տարբեր թույլտվություններ ստանալու) գույքագրում և օպտիմալացում, այդ թվում՝ նաև թվայնացման միջոցով,

14. ՓՄՁ-ների համար մատչելի տեխնոլոգիական լուծումների հասանելիություն ապահովելու միջոցով պետական կառավարման մարմինների հետ հաղորդակցության և հարաբերակցման արդյունավետության ավելացում,

15. առնվազն առաջիկա տարիներին կիրառել պետական և տեղական ինքնակառավարման մարմինների կողմից փոքր և միջին ձեռնարկություններում պլանային և ոչ պլանային ստուգումներ իրականացնելու մորատորիում, ստուգումներ իրականացնելու հնարավորություն նախատեսել միայն և բացառապես անհետաձգելի անհրաժեշտության դեպքում՝ հատուկ ընթացակարգերի հիման վրա,

16. զուգահեռաբար օրենսդրորեն ներդնել հարկային վարչարարության այնպիսի մեխանիզմներ, որոնց պայմաններում հարկային ստուգումները ՓՄՁ-ներում իրականացվելու են միայն բացառիկ դեպքերում։        

Վետերանների հարցերով պետական մարմնի շահառուները 

«Վետերան» հասկացության հստակ ձևակերպումն առանցքային նշանակություն ունի ինչպես նրանց նկատմամբ պետական քաղաքականության մշակման, այնպես էլ դրանից բխող համապատասխան ծրագրերի և միջոցառումների իրականացման համար։

Վետերան կատեգորիան պետք է համալրվի և ներառի՝

✓ պատերազմի և մարտական գործողությունների վետերաններ՝ Հայրենական մեծ պատերազմի վետերաններ, 

Աֆղանստանի պատերազմի վետերաններ, ԽՍՀՄ զինված ուժերի մասնակցությամբ լոկալ պատերազմների և հակամարտությունների մասնակիցներ, ՀՀ տարածքում, ԱՀ տարածքում և այլ պետությունների տարածքում ռազմական գործողությունների մասնակիցներ,

✓ զինվորական ծառայության վետերաններ՝ ծառայության ընթացքում հաշմանդամություն ձեռք  բերած զինծառայողներ, ռազմագերիներ, անհետ կորած զինծառայողներ, զոհված զինծառայողների ընտանիքներ, զորացրված զինծառայողներ։

Նախնական գնահատականներով վետերանների հարցերով պետական մարմնի շահառուների թիվը կկազմի առնվազն 35-40 հազար մարդ։

Հայաստանի Հանրապետությունում ռազմարդյունաբերության զարգացմանը զարկ է տրվել 2016 թվականի ապրիլյան իրադարձություններից հետո։ Տեղական զարգացած ռազմարդյունաբերություն ունենալը հատկապես արդիական է դարձել է 2020 թվականի 44-օրյա պատերազմի արդյունքում։

Թեև Հայաստանում ռազմարդյունաբերությունը գտնվում է հիմնականում սաղմնային վիճակում, առկա են լուրջ նախադրյալներ արդյունաբերության այդ ճյուղը զարգացնելու և մեր երկրի անվտանգությանը և տնտեսական զարգացմանը ծառայեցնելու համար։ Մասնավորապես, արդեն ձևավորվել և գործում են մի շարք ընկերություններ, որոնք շուկայում մրցունակ սպառազինություններ և զինամթերք են արտադրում, ինչպես նաև նոր բարձր տեխնոլոգիական արտադրանք մշակող մի շարք առաջատար ինժեներական ընկերություններ։

Հայաստանում ռազմարդյունաբերության զարգացումը «Հայաստան» Դաշինքի կարևոր գերկայություններից մեկն է։ Մեր ռազմավարական մոտեցումներն են.

(ա)    տեղական տեխնոլոգիական և ինժեներական կարողությունների ինտեգրման միջոցով Հայաստանի Հանրապետության ռազմական կարիքների բավարարմանն ուղղված ծրագրերի պետական խրախուսում և համակողմանի աջակցություն, ռիսկային ծրագրերի ֆինանսավորման ճկուն մեխանիզմների ներդրում,

(բ)     Հայաստանի գիտա-տեխնոլոգիական պոտենցիալի օգտագործմամբ ռազմարդյունաբերության առանձին ճյուղերի ձևավորման և արագացված զարգացման խթանում, այդ թվում նաև արտադրանքի միջազգային առաջմղմանը և արտահանմանը պետական աջակցության միջոցով,

(գ)     տեղական ռազմարդյունաբերական համալիրի և Հայաստանի ռազմավարական գործընկերների ռազմարդյունաբերական համալիրների միջև համագործակցության զարգացման և հնարավոր համատեղ ծրագրերի իրականացման ակտիվ խթանում,

(դ)     ՀՀ կրթության և գիտության համակարգում այնպիսի թիրախային ծրագրերի իրականացում, որոնք հնարավորություն են տալիս ռազմարդյունաբերության ոլորտի զարգացման համար ձևավորել անհրաժեշտ կադրային ռեսուրս, ինչպես նաև ընդհանուր օգտագործման գիտական կարողություններ,

(ե)     պարտադիր ժամկետային զինվորական ծառայության շրջանակներում հատուկ ստորաբաժանումների ձևավորում, ուղղված զինված ուժերում նորարական տեխնոլոգիաների զարգացմանը, ադապտացմանը և կիրառմանը, 

(զ)     Հայաստանի Հանրապետությունում ռազմարդյունաբերական համալիրի զարգացման համար անհրաժեշտ ինստիտուցիոնալ կառուցակարգերի ձևավորում, այդ թվում նաև ՀՀ Ռազմարդյունաբերական Կոմիտեի դերի ուժեղացման, և Պաշտպանության նախարարության և Կոմիտեի միջև փոխգործակցության մեխանիզմների կատարելագործման միջոցով,

(է)     Մասնավոր-պետական համագործակցության զարգացում ռազմարդյունաբերական համալիրի համակարգային խնդիրների լուծման համար, մասնավոր ներդրումների խրախուսում ոլորտում առաջատար կարողություններ ստեղծելու նպատակով։